Додситони ҳарбии минтақаи Кӯлоб натиҷаи таҳқиқи марги Ботир Эргашев, сарбози қисми ҳарбии КДАМ дар ноҳияи Шамсуддини Шоҳинро эълон кард.
Фирӯз Раҷабзода, додситони низомии Кӯлоб, рӯзи 31-уми январ зимни нишасти матбуотӣ изҳор дошт, ки Эргашев худкушӣ кардааст. Ба гуфтаи ӯ, ҳеҷ гуна фишор ё муносибати ғайриоинномавӣ нисбат ба сарбоз вуҷуд надоштааст ва марги ӯ ба хидмати ҳарбӣ рабт надорад.
Мурд ё кушта шуд? Назари хонаводаи сарбоз
Аммо падари Ботир Эргашев бо хулосаи додситон розӣ нест. Вай аз оғози қазия таъкид дошт, ки писарашро куштаанд.
«Ман ба хулосаи мақомот бовар надорам. Дар бадани писарам осори зарбу лат ва шикастагӣ буд. Ҳарду мояаш кабуд буд, дар пушти сараш шикофи калон буд, лабҳояш дарида буд. Мо писарамро бо ин ҳолат гирифтем,» – гуфт Баҳодур Эргашев, падари сарбоз.
Ба гуфтаи ӯ, сардори дидбонгоҳ гуноҳ надорад, аммо мақомот тамоми масъулиятро ба ӯ бор кардаанд:
«Ӯро қапида, ҳамаи гуноҳро ба ҳамон партофтаанд. Дар ҷои ҳодиса набудааст, чаро ҳама гуноҳро ба он бор мекунанд?»
Парвандаи ҷиноӣ ва омори марги сарбозон
Бо вуҷуди он ки додситон худкушӣ будани марги сарбозро таъкид кард, ҳамзамон эълон кард, ки нисбат ба сардори дидбонгоҳи сарҳадӣ парвандаи ҷиноӣ боз шудааст. Ӯро ба хунукназарӣ муттаҳам кардаанд.
Ботир Эргашев 20-сола буд ва соли 2022 бо хоҳиши худ ба артиш пайваста, даҳ рӯз то поёни хидматаш боқӣ монда буд.
Марги сарбозон дар артиши Тоҷикистон мавзӯи доғ боқӣ мемонад. Омбудсмен дар гузориши соли 2023 сабти марги 40 сарбозро таъйид карда буд, ки аз онҳо 8 нафар худкушӣ, 6 нафар аз беморӣ фавтидаанд.
Додситони ҳарбии Кӯлоб мегӯяд, дар минтақаи зери назорати ӯ соли 2024 чор ҳодисаи марги сарбозон сабт шудааст. Аз ҷумла, як нафар аз газидани саг ва дигаре ҳангоми беэҳтиётӣ бо силоҳ ҷон бохтаанд.
Нигарониҳо аз вазъи артиш
Мақомот пайваста таъкид мекунанд, ки вазъ дар артиш беҳтар шудааст. Аммо волидони сарбозон ҳамоно аз шароитҳои сахт, озору азият ва муносибати бераҳмона шикоят мекунанд.
Ҳанӯз ҳам бисёре аз марги сарбозон бо «худкушӣ» рабт дода мешавад, дар ҳоле ки аксар хонаводаҳо ва фаъолони ҷомеа ба ин фарзия шубҳа доранд. Оё марги Ботир Эргашев танҳо як ҳодисаи тасодуфӣ буд, ё боз як сарбозе зери шиканҷа ҷони худро аз даст дод?
