Тибқи маълумоти дастрасшуда, раисҷумҳури Ҷумҳурии Ӯзбкистон Шавкат Мирзиёев, дастур додааст, ки масоҷиди қаблан мамнӯъ дар маҳалҳо бари худро ба рӯи намозгузорон боз намоянд.
Аксари масоҷид, ки дар маҳалҳо фаъолият доштанд, дар замони ҳукмронии Ислом Каримов аз фаъолият бозмонда, солҳо ин ҷониб дар онҳо намоз гузорида намешуд. Дар ҳар ноҳия ва шаҳр як адад масҷид ба ҳуқуқи намозгузории мусалмонон дастёб шуда буд.
Гуфта мешавад, ки Мирзиёев, раҳбари феълии Ӯзбекистон дари масоҷиди мамнӯъро дубора ба рӯи мусалмонон кушодааст ва ҳоло дар хонаҳои Худо омодагӣ ба намозҳо идома доранд. Муддати як даҳсола, ки онҳо баста буданд, асбобу анҷомашон парешон буд. Ҳоло мутасаддиён шароити намозгузориро дар н масоҷид дубора муҳайё месозанд ва тахмин меравад, ки аз нимаи дуюми моҳи апрел имкони гузоридани намозҳо сад дар сад фароҳам меояд.
Дар ҳамин ҳол таъкид мешавад, дар масоҷиди маҳалҳо ба намозҳои ҷорӣ рухсат дода шудааст. Намоҳи рӯзи ҷумъа дар онҳо хонда намешаванд. Намози Ҷумъа танҳо дар масоҷиди ҷомеъ баргузор мегардад. Инчунин намози рӯзҳои ид ҳам ҳар масоҷиди ҷомеъ гузаронида шуда, масоҷиди маҳалҳо аз ин имкон бархӯрдор нестанд. Ин иқдоми ҳукуматро мусалмонони Ӯзбекистон бо мамнуният пазироӣ намуда, дар ҳаққи президенти кишвари худ дуои хайр мекунанд.
Шавкат Мирзиёев, раисҷумҳури Ӯзбекистон тасмим гирифтааст, ки рӯ ба халқ оварад ва соли 2017ро дар кишвараш «Соли гуфтугӯ бо мардум» унвон намуда, бештар аз дардҳои ҷомеа меандешад.
