Пайвандони Сӯҳроб Ҳасанов, яке аз маҳбусони кушташуда дар ҳодисаи зиндони Ваҳдат, пас аз як шабонарӯз боздошт шудан аз тарафи кормандони шуъбаи корҳои дохилии ноҳияи Шамсиддини Шоҳин озод гардиданд.
Раҳматулло Ҳасанов, бародари дигари Сӯҳроб Ҳасано, ки дар Олмон иқомат мекунад, ба Радиои Озодӣ гуфтааст, ки падари 85-солаи онҳо Сафармад Ҳасанов ва ҳашт нафар аз хонаводаашон боздошт ва як шабонарӯз дар ҳабс нигоҳ дошта шуданд. Ба гуфтаи ӯ, мақомот онҳоро бо шарти “накушодани қабри Сӯҳроб Ҳасанов” озод кардаанд.
Мақомоти расмӣ ҳанӯз вокуниш накардаанд
Дар ҳоле ки наздикони кушташудагон дар бораи фишорҳо ва маҳдудиятҳо сӯҳбат мекунанд, мақомоти расмии Тоҷикистон дар бораи ин боздошт ҳеч гуна изҳорот пахш накардаанд.
Ёдовар мешавем, ки рӯзи 3 феврал дар изҳороти Раёсати иҷрои ҷазои ҷиноятии Вазорати адлияи ТоҷикистонСафармад Ҳасанов гуфта шуда буд, ки гурӯҳе аз зиндониён бо қасди фирор ба маъмурони зиндон ҳамла карда, се нафар кушта шудаанд.
Аммо манбаъҳои мустақил, аз ҷумла Кумитаи наҷоти гаравгонҳо ва зиндониёни сиёсӣ, шумори кушташударо то 7 нафар хабар додаанд, ки Сӯҳроб Ҳасанов ва Ҷамолиддин Ҳасанов, ду бародар, низ дар миёни онҳо буданд.
Наздикон ҳаққи дидани ҷасадро надоштанд
Ба гуфтаи Раҳматулло Ҳасанов, баъди кушта шудани бародараш ба падару аъзои дигари хонавода иҷоза надодаанд, ки ҷасади ӯро бубинанд ва худашон ӯро ба хок супурданд.
Вай афзуд, ки рӯзи 7 феврал, пас аз боздошт ва озодии хонаводааш, бо сардори шуъбаи корҳои дохилии ҷамоати Саричашма тамос гирифта, сабаби боздошти онҳо ва фишорҳоро пурсид. Ба гуфтаи ӯ, ҷавоби мақомот чунин буд:
❝Чаро дар бораи марги бародарат дар маҳбас ба расонаҳо хабар додӣ?❞
Фишор ба наздикони зиндониён – таҷрибаи пешина
Ин нахустин маврид нест, ки наздикони зиндониёни сиёсӣ ё афроди кушташуда таҳти фишор қарор мегиранд. Пештар созмонҳои ҳуқуқи башар ва расонаҳо борҳо гузориш дода буданд, ки мақомот бо таҳдид ва боздоштҳо кӯшиш мекунанд, наздикони қурбониёнро аз сӯҳбат бо расонаҳо ва расонаӣ кардани ҳодисаҳо манъ кунанд.
Санҷидани ҷузъиёти ҳодиса бо далелҳои мустақил феълан имкон надорад, аммо чунин ҳолатҳо дар гузашта низ барои хомӯш кардани овози мухолифин ва хешовандони онҳо рух додаанд.
📌 Мо ин қазияро пайгирӣ мекунем ва дар сурати дастрас шудани маълумоти бештар, шуморо хабардор хоҳем кард.
