Имрӯз таҳти раёсати Раиси Ҳукумати Ҷумҳурии Тоҷикистон Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор шуд.
Тибқи дафтари матбуотии Ҳукумати Ҷумҳурии Тоҷикистон, зимни ҷаласа дар хусуси лоиҳаи Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба танзими қувваи корӣ дар Давлати Қатар Вазири меҳнат, муҳоҷират ва шуғли аҳолӣ Сумангул Тағойзода гузориш додааст.
Эмомалӣ Раҳмон муҳимияти созишномаи мазкурро дар танзими қувваи кории Тоҷикистон дар Давлати Қатар таъкид карда, роҳбарони сохторҳои масъули мамлакатро вазифадор намудааст, ки барои ҳукми қонунӣ гирифтани созишномаи байниҳукуматии Тоҷикистон ва Қатар дар соҳаи муҳоҷирати меҳнатӣ тадбирҳои зарурӣ андешанд. Президент таъкид кардааст, ки имзои ин созишномаи ҳамкории дар сатҳи роҳбарони ду давлат мувофиқа гардида, метавонад дар оянда муносибатҳои дуҷонибаи Тоҷикистону Қатарро дар соҳаҳои мавриди таваҷҷуҳ рушду тавсеаи бештар бахшад.
Маврид ба зикр аст, ки солҳои охир муносибати Тоҷикистон бо кишварҳои арабӣ рӯ ба беҳбудӣ аст. Сохтмони масҷиди бузургтарини Осиёи Марказӣ дар Душанбе, ки бояд соли оянда мавриди истифода қарор гирад бо сарфи муодили тақрибан сад миллион доллар, сармояи давлати Қатар ва Тоҷикистон дар ҳоли анҷомёбист.
Аммо дар байн ба хотири ошкор шудани истифодаи ғайри мақсадноки сармояи барои масҷид ҷудокардаи давлати Қатар, як муддат сохтмони ин масҷид таваққуф карда буд.
Ҷустуҷӯи роҳи муҳоҷират ба суи кишварҳои арабӣ иқдоми нав набуда, собиқ роҳбари ҲНИТ Саид Абдуллоҳи Нурӣ низ наздик ба 15 сол пеш аз ин, ҳини як сафараш ба кишварҳои арабӣ, ҷиҳати дарёфти ҷои кор барои садҳазор муҳоҷири тоҷикистонӣ ба мувофақа расида буд. Аммо ин иқдом ҳамонвақт аз ҷониби ҳукумати Тоҷикистон бо сабабҳои номаълум дастгирӣ наёфта буд.
