Дар Тоҷикистон шахсони ҳуқуқӣ ва соҳибкорони инфиродӣ метавонанд нуқтаҳои тиҷоратии нерӯдиҳӣ боз кунанд. Аммо аз моҳи августи соли 2026 барои фурӯши нерӯи барқ тавассути чунин нуқтаҳо иҷозатномаи махсуси Вазорати энергетика ва захираҳои об талаб карда мешавад.
Кадом ҳуҷҷатҳо заруранд ва нерӯи барқ барои мошинҳои барқӣ чӣ қадар арзиш дорад?
Чӣ тағйир ёфт?
Қаблан соҳибкороне, ки нуқтаҳои нерӯдиҳӣ мекушоданд, пайвастшавӣ ба шабакаи барқро ба расмият дароварда, бо ташкилоти дахлдори таъминкунандаи барқ (ҶСК «Шабакаҳои тақсимоти барқ») шартномаи таъмини барқ мебастанд.
Акнун барои фурӯши тиҷоратии нерӯи барқ тавассути нуқтаҳои нерӯдиҳӣ дарёфти иҷозатномаи махсуси Вазорати энержӣ ва захираҳои об зарур аст.
Вазорати энергетика ва захираҳои об дар ин бора 1-уми октябр расман хабар дод. Ин талабот ҳам ба онҳое, ки ҳоло нияти кушодани нуқтаи нерӯдиҳиро доранд ва ҳам ба соҳибкороне, ки аллакай дар ин бозор фаъолият мекунанд, дахл дорад.
Ба ин тариқ, танҳо доштани шартнома бо ташкилоти таъминкунандаи барқ дигар барои фурӯши тиҷоратии нерӯи барқ кофӣ нест. Барои фаъолияти қонунӣ, иҷозатномаи Вазорати энержӣ ва захираҳои об зарур аст.
Кӣ метавонад нуқтаи нерӯдиҳӣ боз кунад?
Дар Тоҷикистон шахсони ҳуқуқӣ ва соҳибкорони инфиродӣ метавонанд бо риояи талаботи муқарраршуда ба фаъолияти тиҷоратии фурӯши нерӯи барқ ба мошинҳо машғул шаванд.
Ин маънои онро дорад, ки на танҳо ширкатҳои махсуси энержӣ, балки, масалан, меҳмонхонаҳо, ширкатҳои тиҷоратӣ ё корхонаҳое, ки таваққуфгоҳҳои мошин доранд, ба боз кардани нуқтаҳои нерӯдиҳӣ ҳуқуқ доранд. Соҳибкорони инфиродӣ низ метавонанд ба ин навъи тиҷорат машғул шаванд.
Дар баробари ин, шахси воқеии одӣ, ки ҳамчун соҳибкор сабтином нашудааст, наметавонад танҳо бо насби нуқтаи нерӯдиҳӣ ба фурӯши барқ оғоз кунад. Барои чунин фаъолият доштани мақоми дахлдори соҳибкорӣ, гирифтани иҷозатнома ва иҷрои талаботи техникӣ зарур аст.
Бояд мавҷудияти зерсохтори зарурӣ, имкониятҳои техникӣ ва мутахассисони дорои таҳсилоти мувофиқ тасдиқ карда шавад.
Талабот нисбат ба хоҳишмандони дарёфти иҷозатнома дар сомонаи расмии Вазорати энержӣ ва захираҳои об нашр шудаанд.
Барои фаъол кардани нуқтаи нерӯдиҳӣ чӣ бояд кард?
Ин раванд чанд марҳилаи асосиро дар бар мегирад.
1. Доштани сабти номи шахси ҳуқуқӣ ё соҳибкори инфиродӣ
Агар ширкат ё соҳибкори инфиродие, ки аллакай фаъолият мекунад, нияти фаъол кардани нуқтаи нерӯдиҳиро дошта бошад, дубора сабти ном кардани тиҷорат зарур нест. Танҳо бояд мутобиқати фаъолияти худро ба талаботи муқарраршуда санҷад.
Шаҳрванде, ки ҳанӯз ҳамчун соҳибкор сабти ном нашудааст, бояд аввал худро ҳамчун соҳибкори инфиродӣ ё шахси ҳуқуқӣ ба қайд гирад. Бақайдгирии давлатӣ аз ҷониби Кумитаи андози Тоҷикистон тибқи усули «равзанаи ягона» анҷом дода мешавад.
2. Интихоби ҷой барои насб
Нуқтаи нерӯдиҳиро метавон дар назди маркази савдо, меҳмонхона, таваққуфгоҳи мошинҳо ё дигар иншооти мувофиқ ҷойгир кард. Аммо на танҳо интихоби ҷойи муносиб, балки омода кардани ҳуҷҷатҳо барои истифодаи он низ зарур аст.
Тибқи талаботи Вазорати энержӣ ва захираҳои об, барои гирифтани иҷозатнома бояд қарор дар бораи ҷудо кардани қитъаи замин пешниҳод карда шавад.
3. Санҷиши имконияти пайвастшавӣ ба шабакаи барқ
Пеш аз харидани таҷҳизот бояд муайян кард, ки оё иқтидори барқ барои нуқтаи оянда кофӣ аст ё не. Ин махсусан барои дастгоҳҳои нерӯдиҳии босуръат муҳим аст, зеро онҳо нерӯи барқро хеле бештар сарф мекунанд.
Барои ин соҳибкор ба ташкилоти дахлдори шабакаҳои тақсимоти барқ муроҷиат карда, шартҳои техникии пайваст кардани таҷҳизотро мегирад.
Агар иқтидори мавҷудаи барқ нокофӣ бошад, мумкин аст корҳои иловагӣ анҷом шавад ё лоиҳаи пайвастшавӣ тағйир ёбад.
4. Омода кардани ҳуҷҷатҳои лоиҳавӣ
Барои ҷойгир кардани нуқтаи тиҷоратии нерӯдиҳӣ лоиҳае зарур аст, ки шартҳои техникии пайвастшавӣ ва хусусиятҳои таҷҳизотро ба назар гирад.
Дар рӯйхати ҳуҷҷатҳои Вазорати энержӣ ва захираҳои об хулосаи ташхиси давлатии ҳуҷҷатҳои лоиҳавии шаҳрсозӣ пешбинӣ шудааст.
Барои омода кардани лоиҳа метавон ба ташкилоти махсуси лоиҳакашӣ муроҷиат кард.
5. Гирифтани иҷозатномаи Вазорати энержӣ ва захираҳои об
Пас аз омода кардани ҳуҷҷатҳои зарурӣ шахси ҳуқуқӣ ё соҳибкори инфиродӣ ба Вазорати энержӣ ва захираҳои об ариза пешниҳод мекунад. Дар сомонаи расмии вазорат ҳуҷҷатҳои зерин зикр шудаанд:
- ариза бо нишон додани навъи фаъолият;
- ҳуҷҷат дар бораи бақайдгирии давлатии шахси ҳуқуқӣ ё соҳибкори инфиродӣ;
- ҳуҷҷатҳои тасдиқкунандаи пардохти маблағ барои баррасии ариза;
- маълумот дар бораи заминаи моддию техникӣ ё шартномаи иҷора;
- ҳуҷҷатҳои тасдиқкунандаи мавҷудияти мутахассисони дорои таҳсилоти соҳавӣ;
- ваколатнома, агар ҳуҷҷатҳоро намоянда пешниҳод кунад.
Барои нуқтаи нерӯдиҳӣ ба таври иловагӣ маълумот дар бораи иқтидори дастраси шабакаи барқ, хулосаи ташхиси давлатии ҳуҷҷатҳои лоиҳавӣ, қарор дар бораи ҷудо кардани қитъаи замин ва шартҳои техникии пайвастшавӣ ба шабакаи барқ заруранд.
Ҳуҷҷатҳоро метавон тавассути сомонаи расмии иҷозатномадиҳии Вазорати энержӣ ва захираҳои об пешниҳод кард.
6. Ба расмият даровардани таъмини барқ ва оғози фаъолият
Ба ғайр аз иҷозатнома, масъули нуқта бояд пайвастшавии қонунии онро ба шабакаи барқ таъмин карда, муносибатҳои шартномавиро бо таъминкунандаи нерӯи барқ ба расмият дарорад. Дар баробари ин, гирифтани шартҳои техникии пайвастшавӣ ва бастани шартномаи таъмини барқ ду раванди алоҳида мебошанд.
Пас аз анҷоми корҳои зарурии техникӣ, ба расмият даровардани шартнома ва ҳуҷҷатҳои пешбинишуда, нуқтаро метавон барои фурӯши нерӯи барқ ба мошинҳои барқӣ истифода бурд.
Иҷозатнома чӣ қадар нарх дорад?
Дар сомонаи расмии Вазорати энержӣ ва захираҳои об барои фаъолият дар самти истеҳсол, интиқол, тақсимот ва фурӯши нерӯи барқ ду навъи пардохт зикр шудааст.
Барқ барои нуқтаҳои нерӯдиҳӣ чӣ қадар арзиш дорад?
Аз 1-уми феврали соли 2026 дар Тоҷикистон таърифаҳои нави нерӯи барқ амал мекунанд, ки бо қарори ҳукумат таҳти №709 аз 29-уми декабри соли 2025 тасдиқ шудаанд.
Барои нуқтаҳои тиҷоратии нерӯдиҳӣ арзиши як киловатт-соат нерӯи барқ бидуни назардошти андоз аз арзиши иловашуда (ААИ) 94,65 дирамро ташкил медиҳад. То болоравии таърифаҳо арзиши як киловатт-соат 80,90 дирам буд.
Ба гуфтаи соҳибони нуқтаҳо, фарқияти байни нархи хариди нерӯи барқ ва арзиши нерӯдиҳӣ барои муштариён фоидаи соф ба ҳисоб намеравад. Аз пули бадастомада масъулони нуқтаҳо бояд андоз, хароҷоти нигоҳдории таҷҳизот, иҷораи ҳудуд ва дигар хароҷотро пардохт кунанд.
Оё барои пур кардани батареяи мошини шахсӣ иҷозатнома зарур аст?
Агар шахс дар хона танҳо барои мошини шахсии худ дастгоҳи нерӯдиҳӣ насб кунад ва барқро ба дигарон нафурӯшад, барои фурӯши тиҷоратии нерӯи барқ гирифтани иҷозатномаи махсус талаб карда намешавад. Талаботи нав маҳз ба фаъолияти соҳибкорӣ дар самти фурӯши нерӯи барқ тавассути нуқтаҳои нерӯдиҳӣ дахл доранд.
Дар ҳамин ҳол, қоидаҳои бехатарии барқ ва талаботи техникӣ барои пайваст кардани таҷҳизот, сарфи назар аз он ки дастгоҳи нерӯдиҳӣ барои эҳтиёҷоти шахсӣ ё тиҷорат истифода мешавад, бояд риоя карда шаванд.
Соҳибони нуқтаҳои нерӯдиҳии фаъолиятдошта бояд чӣ кор кунанд?
Талаботи нав ба соҳибкороне низ дахл доранд, ки аллакай ба нерӯдиҳии тиҷоратии батареяи мошинҳои барқӣ машғуланд. Вазорати энержӣ ва захираҳои об аз онҳо даъват кардааст, ки тибқи тартиби муқарраршуда иҷозатномаҳои дахлдор гиранд.
Ба ин тариқ, мавҷудияти шартномаи қаблан имзошуда оид ба таъмини барқ масъулони нуқтаҳои фаъолиятдоштаро аз иҷрои талаботи нав озод намекунад.
Нуқтаҳои нави нерӯдиҳӣ
Ҷорӣ шудани низоми иҷозатномадиҳӣ дар пасманзари рушди нақлиёти барқӣ дар кишвар сурат мегирад.
Барои рушди зерсохтори нерӯдиҳӣ ба мошинҳои барқӣ пуркунии барқ ҳудуди 167 млн сомонӣ пешбинӣ шудааст. Мақомот ният доранд, ки қисми зиёди маблағгузориро аз бахши хусусӣ ҷалб кунанд.
Барои гирифтани иҷозатнома ба куҷо метавон муроҷиат кард?
Иҷозатномаҳо барои фурӯши нерӯи барқ тавассути нуқтаҳои нерӯдиҳӣ аз ҷониби Вазорати энержӣ ва захираҳои об дода мешаванд.
Суроға: Душанбе, кӯчаи Шамсӣ, 5/1.
Телефон барои маълумот: +992(37)235-98-51.
Сомонаи иҷозатномадиҳӣ: https://ijozat.mewr.tj/https://ijozat.mewr.tj/
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
