Кормандони Шуъбаи ВКД-2 дар ноҳияи Сино Ҳазратқулова Умеда, сокини 27-солаи ноҳияи Шаҳритусро бо иттиҳоми қаллобӣ боздошт карданд.
Эълони бардурӯғ дар сомонаи “Сомон.tj”
Тавре мақомот хабар доданд, Умеда Ҳазратқулова бо нашри эълонҳои бардурӯғ оиди иҷора додани манзили истиқоматӣ дар сомонаи маъруфи “Сомон.tj” шаҳрвандони зиёдеро фиреб додааст.
Мақомот то ин замон 12 ҳолати фиреби шаҳрвандонро ошкор намудаанд. Ҳар кадоме аз шаҳрвандон аз 1000 то 2500 сомонӣ зарар дидаанд.
Огоҳии мақомот ба шаҳрвандон
Раёсати ВКД таъкид мекунад, ки чунин ҳолатҳои қаллобӣ ҳамарӯза ба қайд гирифта мешаванд ва шаҳрвандон бояд ҳушёр бошанд.
“Маблағи иҷораро танҳо пас аз қабул ва дидани манзили истиқоматӣ супоред,” — омадааст дар изҳороти мақомот.
Мақомот ҳамчунин аз ҳамаи онҳое, ки эҳтимолан мавриди фиреби Умеда Ҳазратқулова қарор гирифтаанд, даъват карданд, ки ба ШВКД-2 дар н.Сино ва ё бо рақами 018-02-02-02 ба милисаи пойтахт муроҷиат кунанд.
