Зиндони рақами 26 дар вилояти Волгогради Русия, ки бо муносибати бераҳмона ба маҳбусон шӯҳрат дорад, боз дар маркази таваҷҷуҳ қарор гирифт. Баъзе маҳбусони тоҷик шикоят кардаанд, ки маъмурияти зиндон онҳоро маҷбур мекунад, бо Вазорати дифоъи Русия шартнома баста, ба ҷанги Украина раванд.
Як маҳбуси тоҷик, ки бо сабабҳои амниятӣ номаш фош намешавад, дар паёми садоие, ки ба дасти телевизиони “Настоящее Время” расидааст, гуфтааст:
«Тоҷиконро сахт фишор медиҳанд. Ман шартномаро хондам, маъқул нашуд ва имзо накардам. Ҳоло маро ба ШИЗО (ҳуҷраи ҷазодиҳӣ) мефиристанд.»
Ӯ афзудааст, ки шароити нигаҳдорӣ дар зиндон сангин аст:
«Хӯрокро як бор медиҳанд, барқ 24 соат фурӯзон аст ва маҷбур мекунанд, ки то шаб рост истем.»
Каримҷон Ёров, ҳомии ҳуқуқ ва муҳофизи ҳуқуқи муҳоҷирон, тасдиқ мекунад, ки шикояти мазкур ба дасти ӯ расида ва шахсияти маҳбусро мешиносад. Ба гуфтаи Ёров, маҳбусони тоҷик таҳти фишори рӯзафзуни маъмурияти зиндон қарор доранд, то онҳоро ба ҷабҳаи ҷанг фиристанд.
Ёров илова кард, ки усулҳои фишор одатан тавассути интиқол ба ШИЗО, маҳдуд кардани озодиҳои маҳбусон ва шароити сахти зиндон анҷом дода мешавад:
«Соати 6 субҳ рахти хобро мебардоранд, маҷбур мекунанд, то 10-и шаб бо пой рост истанд.»
Ба гуфтаи ӯ, пештар ин ҷалб аз тарафи худи Вазорати дифоъ сурат мегирифт, аммо ҳоло роҳбарияти зиндонҳо мустақилона бо ин кор машғул аст. Сабаби ин амал метавонад дастури губернаторҳо ё созишҳои молиявӣ бо мақомот бошад.
Мақомоти Тоҷикистон дар соли 2023 танҳо 100 мавриди ҷалби маҳбусони тоҷик ба ҷангро тасдиқ карда буданд. Аммо теъдоди воқеии шаҳрвандони тоҷик, ки ба ҷанг дар Украина фиристода шудаанд, номаълум боқӣ мемонад.
Ин вазъ нигарониҳои ҷиддиро дар байни ҷомеаи муҳоҷирони тоҷик ва ҳомиёни ҳуқуқ ба миён овардааст. Онҳо талаб доранд, ки мақомоти тоҷик ва байналмилалӣ чораҳои фаврӣ андешанд, то ҳуқуқҳои шаҳрвандон риоя ва қонуншиканӣ пешгирӣ карда шавад.
