Сайфулло Сафаров, муовини аввали директори Маркази тадқиқотии стратегии назди Президенти Тоҷикистон дар як навиштааш, ки дар “Ҷумҳурият” чоп шудааст, панҷ пешниҳод барои такмили қонуни танзими расму ойин кардааст.
Стратеги рақами дуввум дар нашрияи рақами аввали кишвар замоне ба мавзӯъи қонуни танзими ҷашну маросимҳо пардохтааст, ки мавзӯъи рақами аввали расонаҳо ва гуфтугӯи мардум фасоди мансабдорони баландпояи давлатӣ аст. Албатта ин “иқдоми стротегии” Сафаров намоишӣ буда таъсири кофӣ дар умури зиндагии мардум надорад ва мебояд пеш аз ҳама сарфакориро аз хароҷотҳои ҳангуфти давлатӣ, аз қабили сафарҳои ботантанаи раисиҷумҳури Тоҷикистон Эмомалӣ Раҳмон ва ҷашнҳои пуршукӯҳи тамаллуқӣ оғоз кард, ки дар баробараш тӯйи мардуми камбизоат як наҳорӣ менамояд.
Баъдан ҷаноби Сафаров аз коҳиши фасод ва тарғиби қонунсолорӣ миёни ҷавонон ёдовар шудаанд. Дарҳоле, ки тибқи хабарҳои ахир фасоду ришвахорӣ ба дараҷае баданаи ҳукумати Раҳмонро фалаҷ кардааст, ки худи Агентии зидди фасод дар ин падидаи номатлуб ғӯтавар шудааст. Инҷо лозим ба ёдоварист, ки Фирӯз Холмуродов яке аз кормандони боздоштшудаи Агентӣ баён дошта буд, ки «ман танҳо нахӯрдаам» яъне фасод дар радаҳои болоии ҳокимият ҷо дорад, ки мебояд тадқиқоти эшон бар ин самт равона бошад аз онки чашми мардум хок мепошанд.
Тадқиқот ва ҷилавгирӣ аз фасоду исрофкориҳо дар ядрои ҳукумат ва риояи қонун аз ҷониби мансабдорон худ як дарси амалӣ барои ҷавонон аст, ки мебояд шумо мансабдорон пеш аз ҳама аз худатон оғоз кунед.
Танзими ҷашну маросимҳоро аз хонаи мансабдорон шурӯъ намоед, ки ин шабу рӯз танҳо аз таҳхонаҳои мансабдорон миллионҳо доллар пайдо мешавад ва мардуми омма тавони маросими бузургро надорад.
Баъдан ба ин ҳукуматдорон чи шудааст, ки аз муфтиёт то ба раисиҷумҳур ва ахиран Маркази тадқиқоти стратегӣ ҳама ба ин қонуни танзим панҷа нарм кардаанд? Ё дигар мавзӯъе барои гул задани мардум ва дарак додан аз мавҷудияту ҳастии худ намондааст?
Муртазои Мирзо
