Як муаллими забони англисӣ бо номи Рустам Мирзоев, ки дар яке аз мактабҳои шаҳри Душанбе кор мекардааст, бинобар рад кардани амри роҳбари мактаб оиди ширкат дар роҳпаймоӣ (маршировка), аз кор ронда шудааст.
Айни ҳол Рустам Мирзоев дар Русия қарор дошта, ба кор дар бозор оғоз кардааст. Дар ин бора худи ӯ дар саҳифаи фейсбукиаш иттило додааст.
Рустам навиштааст “Бо амри тақдир ва бо сабабҳои ба худам маълум, ман ҳам номи муҳоҷири меҳнатиро гирифтам. Сабаби муҳоҷир шудани мо маоши кам, ноадолатии баъзе инсонҳо ва ҷӯрабозию порахӯрии сартосарӣ мебошад.”
Баъдан ӯ дар бораи аз кор ронда шуданаш чунин қисса кардааст: “Ман то дирӯз дар яке аз мактабҳои шаҳри Душанбе, ба ҳайси муаллими забони англисӣ дарс медодам. Моҳонаам 500 сомонӣ буд ва ман бо ҳамин маъош қаноат мекардам. Як рӯзи тобистон, аниқтараш моҳи июл, директори муассиса маро занг заду ба маршировка даъват кард. Ман, ки дар рухсатии меҳнатӣ будам, бо вай баҳс кардам. Баъди як ҳафта маро занг заду гуфт, ту аз кор озодӣ. Ман ҳам сабабашро напурсидаму дигар ба чои корам нарафтам.”
Рустам иттило додааст, ки баробари расидан ба Русия, ба кор оғоз кардааст: Ҳоло бошад, дар яке аз шаҳрҳои Русия ба ҳайси савдогар кору фаъолият дорам. Маъошам дар як рӯз 2000 рубл(240 сомон) ро ташкил медиҳад.”
Бо вуҷуди он, ки мақомоти Тоҷикистон даъво доранд, ки роҳпаймоӣ ихтиёрӣ буда, донишҷӯёну кормандони буҷавӣ дар он ихтиёран ширкат мекунанд, шикояту эътирозҳои зиёде аз тарафи ширкаткунандагон ҷой дошта, расонаӣ ҳам мешаванд.
