Варзишгарони тоҷик дар Ҷашнвораи байналмилалии ҳунарҳои размӣ, ки рӯзҳои 3 ва 4 сентябр дар шаҳри Чҳонҷӯи Кореяи Ҷанубӣ баргузор шуд, ду медали нуқра ба даст оварданд.
Барномаи ин мусобиқот 15 намуди варзишро дарбар мегирифт. Дар сабқати самбои размӣ Тоҷикистонро ду варзишгар- Сайриддин Шоев дар вазни то 74 кило ва Муҳаммадризо Қурбонзода дар вазни то 100 кило намояндагӣ карданд. Ҳарду паҳлавони тоҷик ба даври ниҳоӣ роҳ ёфтанд.
Дар қувваозмоии ниҳоӣ Сайриддин аз гӯштингири Узбекистон Шербек Рӯзиев ва Муҳаммадризо аз варзишгари Муғулистон Ариунерден Батбаяр мағлуб гашта, бо медалҳои нуқра мукофотонида шуданд.
Дар ин бора Кумитаи миллии олимпии Тоҷикистон ба расонаҳои маҳаллӣ хабар додааст.
