Хабаргузориҳои русӣ иттилоъ доданд, ки аз боздоштгоҳи муваққатии муҷоҷирони корӣ воқеъ дар шаҳри Гатчинаи вилояти Ленинград 14 нафар фирор намудаанд. Онҳо девори боздоштгоҳро дар ошёнаи аввал ба 1 метр рахна намуда, соати панҷи саҳар, вақте ки ҳама масти хоб будаанд, ба озодӣ баромадаанд ва маҳалли ҳодисаро тарк кардаанд.
Сафорати Тоҷикистон дар Руссия пас аз таҳқиқи пешакии қазия гуфтааст, ки дар байни фирориён ду нафар тоҷикистонӣ ҳам ҳастанд ва боқӣ 12 нафари онҳо шаҳрвандони Ӯзбакистон будаанд.
Ин муҳоҷирони кориро пулиси Сангт Петербург ва вилояти Ленинград барои нақзи қавонини будубош ва ҷой доштани мушкил дар аснодашон боздошт ва то замони ихроҷ аз қаламрав дар боздоштгоҳи Гатчина нигоҳ медоштанд. Пулиси минтақа мегӯяд, айни ҳол 6 нафар фирориро боздошт ва ба боздоштгоҳи низомаш шадидтар интиқол додаанд. Аммо фирориёни боқимонда ҳанӯз дар озодӣ буда, пулис онҳоро ҷустуҷӯ мекунад.
Гуфта мешавад, пулис акнун сабабҳои фирори муҳоҷирони кории боздоштгардидаро таҳқиқ мекунад ва бештар он қазияро мавриди омӯзиш қарор додааст, ки ба ин фирор кӣ кӯмак намудааст. Ҳодисаи фирори муҳоҷирон аз боздоштгоҳи муваққатӣ дар Санкт Петербург нав нест. Қаблан ҳам аз як боздоштгоҳи ин шаҳр воқеъ дар Красное Село шаш муҳоҷири боздоштгардида аз ошёнаи шашум рӯкашҳои ҷойхоби худро буридаву ба шакли ресмон оварда, аз ҳамон баландӣ ба замин мефароянд ва фирор мекунанд.
Фирори муҳоҷирони корӣ аз боздоштгоҳи вилояти Ленинград дар ҳолест, ки ҳафтае қабл мақомоти интизомии Руссия эълом дошта буданд, ки барои ихроҷи боздоштшудагон ба ватанашон маблағ дар буҷаи худ надоранд ва аз депортатсияи онҳо муваққатан даст мекашанд. Боздоштшудагон то тасдиқи буҷа барои соли 2017 дар боздоштгоҳи муваққатӣ интизори депортатсия ба ватан хоҳанд монд.
Ҳолшиносон мегӯянд боздоштгоҳҳои муҳоҷирони корӣ ба ҳадде пур шудааст, ки пулиси қаламрав аз боздошти дигар муҳоҷирон низ худдорӣ менамояд.
