Тибқи иттилои раиси Кумитаи андози Тоҷикистон Нусратулло Давлатзода, ки имрӯз дар ҷаласаи Маҷлиси Намояндагон ҳузур пайдо кард, қарзи корхонаҳо ва соҳибкорон аз андоз дар соли ҷорӣ афзоиш ёфтааст.
Ӯ сабаби афзоиши қарзҳоро, ки дар нӯҳ моҳи солӣ ҷорӣ 125 миллион сомонӣ бештар шуда, ҳамакнун ба 825 миллион сомонӣ баробар шудаанд, бадшавии вазъи соҳибкорону корхонаҳо донист. Ба андешаи раиси Кумитаи андоз вазъи корхонаҳо бо “таъсири омилҳои беруна” бад шудаанд.
Нусратулло Давлатзода гуфт ҳанӯз 30 дарсади андозсупорандагон бақияи қарзҳои худ назди андозро насупоридаанд. Ӯ ин иттилоро дар суханрониаш зимни муаррифии тағйиру иловаҳо “Дар бораи дигар пардохтҳои ҳатмӣ ба буҷет” ироа кард.
Ин тағйиру иловаҳо аз ҷумла ҷалб намудани мақомоти қонунгузорӣ ба раванди ҷалби пардохтҳои ҳатмӣ ба андозро низ пешбинӣ кардааст, ки Давлатзода мутмаин аст ин илова “масъулиятро дар пардохти андозҳо бештар мекунад”.
Аммо коршиносон мегӯянд пурзӯр шудани назорат аз болои соҳибкорону корхонаҳо, ки тағйиру иловаҳои мазкур низ ба он роҳ мекушоянд, сабаби фирори соҳибкорон аз кишвар мешавад.
