Ин санадро Сенати (маҷлиси болоӣ) порлумони Қазоқистон охири ҳафтаи гузашта ба тасвиб расонда аст ва тибқи он Қазоқистон аз ин баъд бо Тоҷикистон расман шарики стратегӣ хонда мешавад.
Дар ин бора дафтари матбуоти парлумони ин кишвар хабар додааст ва дар пайи нашри расмии иттилоия гуфтааст, ки тибқи ин аҳднома ҷонибҳо ӯҳдадор хоҳанд гардид, ки дар қиболи ҳамдигар аз таҳдидҳо ва зӯровариҳо худдорӣ хоҳанд намуд ва бо ҷониби сеюм, ки ба оромии минтақа ва истиқлоли ҳамдигар хатар эҷод мекунад, қарордоде имзо намесозанд.
Гуфта мешавад, муовини вазири корҳои хориҷии Қазоқистон ҳини тасвиби ин аҳднома иброз доштааст, ки шарики стратегӣ будан ба ҳарду ҷумҳурӣ имкон хоҳад дод, ки муносибат ва ҳамкориҳои онҳо дар соҳаҳои мухталиф пештарф кунанд.
Тоҷикистон аҳдномаи шарики стротегиро бо Қазоқистон моҳи декабри соли 2015 ба тасвиб расонда буд. Назар ба гуфтаи Низомиддин Зоҳидӣ, муовини аввали вазири корҳои хориҷии Тоҷикистон ин санад аз 13 бахш иборат аст ва «таъмину таҳкими амнияти миллӣ, сулҳу субот, мубориза бо чолишҳо ва таҳдидҳои нави амниятӣ, рушди ҳамкориҳои ҳарбӣ, ҳарбӣ-техникӣ, рушди ҳамкориҳо дар соҳаҳои энергетика ва нақлиёт, тавсеаи ҳамкориҳои тиҷоратӣ-иқтисодӣ, илмӣ-техникӣ ва ҳамкорӣ дар доираи созмонҳои байналмилалӣ» аз ҷумлаи онҳост.
Ёдовар мешавем, ки аҳдномаи шарики стротегӣ соли гузашта дар Душанбе аз ҷониби Нурсултон Назарбоев, раисҷумҳури ин кишвар ба имзо расида буд. Вай 14 уми сентябри соли 2015 бо як сафари расмӣ ба Тоҷикистон омада буд.
Аз ин пеш Тоҷикистон бо Руссия шарики стротегӣ ба ҳисоб мерафт ва бо тасвиби чунин як қарордод аз ҷониби Сенати парлумони Қазоқистон шумори шарикони стротегии Тоҷикистон ба як адад афзуданд.
