Тибқи иттилои гурезагони тоҷик, ки дар сарҳади Украинаву Лаҳистон қарор доранд, чанд рӯз аст, ки як корманди КДАМТ дар онҷо гаштугузор дорад.
Ду-се рӯзи аввал ӯ кӯшиш кардааст аз худи тоҷикон ва ҳатто кӯдакони онҳо маълумот гирад, вале муяссар нашудааст. Субҳи имрӯз ин корманди КДАМТ бо як нозири минтақавии пулис ва ду корманди Хадамоти муҳоҷирати Украина ба макони будубоши тоҷикон омада, баъзеи онҳоро рӯйхат кардааст.
Ӯ дар суҳбат бо ду нафар аз ин тоҷикон гуфтааст, ки мо бояд шуморо ба Тоҷикистон баргардонем. Ӯ ду нафар занро таҳдид кардааст, ки агар шумо ин бо ин муҳрҳо дар паспортатон ба Тоҷикистон ворид шавед шуморо зиндони хоҳанд кард. Беҳтараш биёед бо мо баргардед ва ба Душанбе равед.
Аммо дар меҳмонхонаи дигар ҳангоме, ки нозири минтақавӣ шиносномаҳои муҳоҷиринро талаб кардаасту он корманди КДАМТ ба рӯйхаткунӣ оғоз кардааст, як зани тоҷик ӯро шинохта ба нозири минтақавӣ ва кормандони Хадамоти муҳоҷирати Украина эътироз кардааст, ки чаро онҳо ба амниятиҳои Тоҷикистон, ки мардум аз дасташон фирор кардааст, кӯмак мекунанд.
Вақте тоҷикони ҷамъшуда ному насаби он корманди КДАМ-ро пурсида, хостаанд аз ӯ аксбардорӣ кунанд, амниятии тоҷик аз ҷои ҳодиса фирор кардааст. Ӯ дар ибтидо худашро раиси ҷамъияти тоҷикон муаррифӣ кардааст. Аммо баъдан худро корманди кумитаи муҳоҷират гуфта, хостааст тоҷикони дар марз бударо сабти ном намояд.
Ин дар ҳолест, ки рӯзона тоҷикони зиёде барои паноҳандагӣ ба кишварҳои дигар муҳоҷират менамоянд. Режими Раҳмон мехоҳад Тоҷикистонро барои мардумаш ба як зиндон табдил намояд. Бо ин кор мехоҳанд пеши роҳи муҳоҷирати тоҷиконро ба Аврупо бигиранд, то садои эътирози онҳо ба гуши касе нарасад.
Ба хусус пас аз онки дар Варшава фаъолони сиёсии тоҷик бо роҳандозии барномаҳои мухталиф парда аз руи ҷиноятҳои режим бардоштанд, ҳукумат мехоҳад пеши роҳи муҳоҷирати тоҷикон баста шавад.
