Дар деҳаи Зарнисори ноҳияи Ҷомӣ масъулин супориш додаанд ба ҷои азон суруди миллии Тоҷикистон гузошта шавад.
Тибқи иттилои як хонандаи Паём.нет дар ин деҳа панҷ масҷид вуҷуд доштааст. Чанд рӯз қабл масъулини ноҳиявӣ ба деҳа омада, ба дари чаҳор масҷид қулф задаанд ва ба мардум амр кардаанд, ки пул ҷамъ кунанд. Вақте мардум сабаб мепурсанд, посух медиҳанд, ки бо пули ҷамъшуда як таҷҳизоти мусиқӣ харида медиҳанд, то қабл аз намоз ба ҷои азон бо садои баланд суруди миллӣ гузошта шавад.
Яке аз ҷамъшудагон гуфтааст мардум аз куҷо пул дорад, қашшоқиро намебинед? Масъулин посух додаанд,
мехоҳед ҳамин, намехоҳед ба дари ин масҷидатон ҳам қулф зада мешавад.
Ин хонандаи мо мегӯяд, қаблан ҳам ҳар гоҳ ба масъулини ноҳиявӣ пул лозим шуд, меомаданду дари масоҷидро қулф мезаданд ва танҳо баъди ҷамъоварии маблағи муайян дари масҷидҳоро мекушоданд. Ҳамчунин ӯ иттило дод, ки дар масоҷид китобчаҳои суханронии Эмомалӣ Раҳмон гузошта шудаанд.
Қаблан ҳам аз баста шудани масоҷид дар шаҳру деҳаҳои кишвар хонандагон ба мо иттило медоданд, аммо ин бори аввал аст, ки масъулин амр кардаанд ба ҷои азон суруди миллӣ гузошта шавад.
Аз хонандагони дигари Паём.нет хоҳиш мешавад, агар чунин ҳодисаҳо дар шаҳру деҳаҳои шумо ҳам рух додааст, лутфан ба мо иттило диҳед.
