Хадамоти федеролии бехатарии Русия (ФСБ) соати 5-и субҳи дирӯз, 18-ноябр 20 нафар тоҷикро аз хонаҳои истиқоматиашон дар шаҳри Березникии минтақаи Перм боздошт намуда, ба шаҳри Перм, маркази ин минтақа бурдааст.
Тибқи иттилои манбаъи мо ин 20 нафарро аз 7-8 хона боздошт кардаанд ва ҳангоми юриш кормандони ФСБ дари ду хонаро шикастаанд. Ҳангоми шикастани дари хона, вазъи яке аз тоҷикон, ки бемории қалб доштааст, бо шиддат ваҳим шуда, ӯро ба беморхона бурдаанд. Аммо баъди беҳтар шудани вазъаш ӯ ҳам ба шаҳри Перм интиқол дода шудааст.
Сабаби ин боздоштҳо ҳанӯз маълум нест, аммо тибқи як иттилои тасдиқнашуда, боздошт бо дархости мақомоти Тоҷикистон сурат гирифтааст. Як ҳафта қабл дар ин шаҳр 2 нафарро боздошт намуда будаанд, ки якеи онҳо аллакай дар ихтиёри мақомоти Тоҷикистон қарор гирифтааст.
Манбаи мо мегӯяд, чанд нафари дигар аз субҳи дирӯз бедарак шудаанд ва телефонҳои дастиашон хомӯш карда шудааст. То нашри ин хабар ҳеҷ иттилое аз онҳо дастрас нашуд. Аз хонандагоне, ки дар ин минтақа қарор доранд хоҳиш мешавад ҳар иттилое аз боздоштшудагон ё нопадидшудагон дар ихтиёр доранд, лутфан ба мо расонанд.
