Оҷонсии консалтингии “Mercer” шароити зиндагӣ дар 450 шаҳри ҷаҳонро аз рӯи 10 нишондиҳанда, ба монанди муҳити сиёсӣ ва иҷтимоӣ, муҳити иқтисодӣ, муҳити иҷтимоӣ-фарҳангӣ, расидагӣ ба хизматрасониҳои тиббӣ, макотиб ва маориф, хизматрасониҳои умумӣ ва ҳамлу нақл, тафреҳ, колоҳои мавриди истифода, маскан ва муҳити зист муайян кардааст.
Аз рӯи ин нишондодҳо сифат ва шароити зиндагӣ дар шаҳрҳоро раддабандӣ намудааст, ки 27-тои ин шаҳрҳо дар миёни бадтаринҳо ҷой дода шудааст.
Шаҳри Душанбе, пойтахти Тоҷикистон аз миёни ин 27 шаҳрҳои бадтарини ҷаҳон дар мақоми 19-ум қарор дорад.
Дар мавриди пойтахти Тоҷикистон гуфта шудааст: “Фақр ва камбуди барқ аз мушкилоти умдаи ин шаҳр ва тамоми кишвар мебошанд. Бонки ҷаҳонӣ низ аз мушкилоти роҳандозии тиҷорат бо таваҷҷуҳ ба зерсохторҳои номусоид ҳушдор медиҳад”.
Аммо ҳолдонон мегуянд, ҳарчанд дар шаҳри Душанбе камбудии норасоии барқ, фақру нодорӣ, адами муҳити озоди сиёсӣ ва фасод дар соҳаи маориф ҳукмфармо бошад ҳам аз ҷиҳати зебоӣ, амнияту оромӣ, зиёд будани фароғатгоҳҳо ва марказҳои фарҳангӣ аз шаҳрҳои пешрафта ҳеҷ камие надорад.
Аз миёни шаҳрҳои Осиёи Марказӣ Тошканд, дар миёни 27 шаҳри бадтарин ҷойи 26, Ишқобод 23 ва Бишкек дар мақоми 21-уми ин раддабандӣ омадааст. Шаҳри Бағдод, пойтахти Ироқ дар мақоми 1-ум қарор гирифта, бадтарин шаҳр барои зиндагӣ дониста шудааст.
Шаҳрҳои Вена, пойтахти Утриш, Сиюрих, шаҳр дар Суис , (Шветсария), Окленд, шаҳр дар Зеландияи Нав, Мюнхени Олмон ва Ванкувери Канада аз панҷгонаи шаҳрҳои писандида маҳсуб шудаанд.
