Ҳукумати Тоҷикистон Барномаи миёнамуддати рушди кишвар барои солҳои 2016-2020-ро омода ва ба парлумон ирсол кардааст, ки тибқи он дар назар дорад пулҳои мардуми кишварро барои пешрафти иқтисод ҷалб намояд.
Бо забони илмиву барномавӣ ин кор “тағйири муносибати мардум ба даромадҳояш” номида мешавад. Давлат ба ин назар аст вақти он расидааст, ки мардум қисме аз даромадҳои худро мустақиман дар иқтисоди кишвар маблағгузорӣ намояд. Ин назари давлатро ҷонишини вазири рушди иқтисод ва савдои Тоҷикистон Умед Давлатзод дар нишасти илмӣ-амалие таҳти унвони “Сиёсати сармоягузории Тоҷикистон: вазъ ва дурнамо”, ки имрӯз 30 ноябр дар Душанбе баргузор шуд, изҳор дошт. Ӯ гуфт даромади мардум танҳо дар истеъмолкунӣ истифода мешавад, дар ҳоле ки бояд қисме аз онҳо барои сармоягузорӣ ва захира сафарбар шавад.
“Мо аллакай дар вазъе қарор дорем, ки ба синфи миёна 25% аҳолӣ таъаллуқ дорад ва бенавоӣ то 31% кам карда шудааст. Акнун бояд аз масрафи даромадҳои худ танҳо барои истеъмол худдорӣ кард. Зарур аст қисме аз ин даромадҳо барои рушди ояндаи иқтисод ва беҳбуди вазъи худи мардум дар шакли сармоягузорӣ ва захира равона гардад” — зикр кард Умед Давлатзод. Ӯ ҳамчунин гуфт ин кор набояд маҷбурӣ бошад ва давлат муваззаф аст шароите офарад, ки худи мардум дар маблағгузорӣ ба иқтисоди кишвар алоқаманд бошад.
Ба сулоли Паём.нет, ки оё ҳукумат метавонад пулҳои мардумро ба иқтисод ҷалб намояд, коршиноси масоили иқтисодӣ Абдуманнон Шералиев посух дод:
Албатта, агар бори буҷаи кишвар дар шакли андозҳои миёншикан ва дар ин авохир ҷаримаҳо бори дӯши мардум намешуд, бизнесҳо ғасб намешуданд, соҳибкорони хориҷиву дохилӣ фирор намекарданд, фасод афзоиш неву ҳади ақал дар як сатҳ меистод, мешуд бовар кард, ки давлатмардон дар ғами иқтисоди кишвар, пулҳои азгардишмондаи мардум, ошносозии мардум бо бизнес ва миллӣ кардани иқтисод ҳастанд. Аммо замоне ки мардум дигар ҳатто ба бонкҳо бовар надорад ва на танҳо аз гузоштани маблағ худдорӣ мекунад, балки мекӯшад пулҳои онҷо дармондаашро бо ҳар роҳе берун орад, ҷалби пулҳои мардум ҳатто то анҷоми ин барнома, яъне соли 2020 ҳам имкон надорад. Ягона роҳе, ки боқӣ мемонад ҷалби маҷбурии ин маблағҳост. Ҳукумат ҳам имкон надорад инро надонад. Пас вақте чунин як барномаро барои солҳои 2016-2020 омода сохтааст, пас бо гумони ғолиб, дар садад аст пулҳои мардумро бо фишор ба иқтисод ҷалб кунад. Аммо то куҷо муваффақ хоҳад шуд ва чӣ натиҷае хоҳад гирифт, мавзӯъи дигар аст.
