ВКД Доғистон ва УФСИН – идораи зиндонҳои Русия хабар доданд, ки рӯзи 30 сентябр ҳамаи 6 маҳбуси аз маҳбаси №2 дар Доғистон фироркардаро баъди як ҳафтаи фирорашон дастгир кардаанд.
Мақомоти ФСИН гуфтаанд, ки маҳбусони фирориро дар ҳудуди ноҳияи бо Доғистон ҳаммарзи Лагани Қалмиқистон боздошт кардаанд.
Гуфтанист, шаби 23 сентябр 6 маҳбус тавассути нақбе, ки дар давоми як сол канда буданд, аз маҳбаси низомаш сахти №2 дар шаҳраки Шамхал дар канори Махачқалъа фирор карданд.
Ду нафари онҳо барои куштор ва 4 тани дигар барои қочоқи маводи мухаддир зиндонӣ шуда буданд. Ду нафар аз ин маҳбусони фирорӣ аз Тоҷикистон будаанд.
Шомил Бойматови 29-сола аз ноҳияи Ёвон ва Маҳмадрасул Машрабов аз Душанбе дар ҷумҳурии Қарачаю Черкес бо ҷурми қочоқи маводи мухаддир маҳкум шуда, як сол пеш барои адои ҷазо ба маҳбаси Шамхал оварда шуданд. Бойматов ба 12 соли зиндон ва Машрабов ба 8 соли зиндон маҳкум шуда буданд.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
