Раиси шаҳри Душанбе Маҳмадсаид Убайдуллоев бо қаноатмандӣ гуфтааст, дар пайи чорабиниҳои фаврӣ, ки ба хотири 130 рӯзи ободонӣ дар пойтахт баргузор гаштанд, давоми соли ҷорӣ ҳар навъ иншооте, ки ба таври худсарона дар шаҳр сохта шудаанд, вайрон карда шуданд.
Раиси шаҳр дар ҳисоботи солонаи худ зикр намудааст, ки 164 дӯкон, 1144 танӯр, 3273 мошинсарой, 134 контейнер, ки бидуни иҷозати идороти дахлдор ғайриқонунӣ бунёд ёфта буданд, ба тамом тахриб гардиданд ва “Дар натиҷа 559 ҳазору 279 метри мураббаъ замини истифодаи умум ба ҳолати аввала баргардонида шуд”.
Маҳадсаид Убайдуллоев кори нафаронеро, ки дар қатори биноҳо, мошинсарой ва дигар иншоот ба тахриби танӯрҳои мардум даст заданд, “заҳмати хастанопазир” номид ва фаъолияти онҳоро ситоиш намуд.
Шаҳрдории Душанбе ният дорад, ки соли оянда ба ҷои заминҳои холишуда майдончаҳои варзишӣ барои бачаҳо бисозад. Аммо мардуми ҳолдон дар он назаранд, ки масъулин ин қитъаҳои холишударо бар ивази ришва ба одамони сарватманд дубора хоҳанд фурӯхт ва кӯдакони маҳаллаҳои шаҳр майдонҳои бозиро дар хоби шаб хоҳанд дид.
