Сафедорак макони варзишҳои зимистона дар наздикии Душанбе аст, ки дирӯз Президент Раҳмон онҷо суханронӣ намуда ба лижаронӣ ҳам машғул шудааст. Ӯ дар ҳоле ба ин маҷмуаи варзишӣ рафтааст, ки гуфта мешавад соҳиби нави ин маҷмуа, ки пештар онро бо 2 миллион сомонӣ харидорӣ карда буд, ҳоло бо 80 миллион онро бозсозӣ кардааст. Дар як соли пеш пас аз фуруши ин маҷмуи варзишӣ ба ширкати “Сафед дара” пинҳон мондани номи соҳибони ин ширкат ҳам сарусадоҳои зиёдеро дар расонаҳо ба вуҷуд овард. Аммо пас аз онки Шамсулло Соибов домоди Раҳмон роҳбари анҷумани намудҳои зимистонаи варзиш гардид, аксарият ба ин натиҷа расиданд, ки ин маҷмуъа ҳам аз доираи оила берун нарафтааст. Мисли ширкати пулчинаки IRS соҳиби ин ширкат ҳам яке аз афроди хонаводаи Президент ва ба эҳтимоли зиёд Шамсулло мебошад.
Масъалаи эълон накардани номи соҳибони ширкатҳо дар Тоҷикистон як масъалаи оддӣ шудааст. Зеро Раҳмон дарк кардааст, ки ба хонавода ва наздикони худаш бо нархҳои арзон фурухтани иншоотҳои муҳими кишвар рӯзе барояш дарди сар эҷод хоҳад кард. Аз тарафи дигар агар соҳибони ин ширкатҳо маълум шаванд, муҳри таъйиде хоҳад буд бар хонаводагӣ будани ҳукумати ӯ ва диктатор будани худаш.
