Як масъули бахши почтаи шаҳри Ҳисор бо иттиҳоми азонихудкунии маблағҳои ҷамъоваришуда барои обуна ба нашрияҳо мавриди таҳқиқ қарор гирифтааст.
Тибқи иттилои нашршуда аз ҷониби Оҷонсии назорати давлатии молиявӣ ва мубориза бо коррупсия, Каримова Н.Р., ки ҳамчун директори Маркази алоқаи почтаи шаҳри Ҳисор фаъолият мекард, ба азонихудкунии беш аз 100 ҳазор сомонӣ пули обуна гумонбар мешавад.
Чӣ рӯй дод?
Ба иттилои мақомот, Каримова дар ҷараёни ҷамъоварии маблағ барои обунаи нашрияҳо аз муассисаҳои соҳаи маорифи шаҳр дар солҳои 2024–2025, дар маҷмуъ 365 178 сомонӣ ҷамъоварӣ намудааст. Аммо аз ин ҳисоб 103 406 сомонӣ ғайриқонунӣ ба нафъи шахсӣ истифода шудааст.
Дар маълумоти Оҷонсӣ омадааст, ки парванда бо моддаи 245 қисми 3 банди “а” (азонихудкунӣ ё исрофкорӣ дар ҳаҷми махсусан калон) боз шуда, ба додгоҳ ирсол шудааст.
Мақомот хомӯшанд, гумонбар чӣ мегӯяд?
Дар мавриди боздошт шудани Каримова ё баён кардани мавқеи ӯ дар робита ба иттиҳом ҳанӯз иттилои расмӣ дастрас нест. Мақомот низ то кунун аз ироаи ҷузъиёти бештар худдорӣ мекунанд.
Фасод — мушкили решадор
Ин қазия дар пасманзари афзоиши парвандаҳои марбут ба фасод дар Тоҷикистон ба миён меояд. Ба иттилои Оҷонсии зиддифасод, танҳо дар соли 2024 беш аз 2 300 ҷинояти коррупсионӣ ошкор шуда, 728 парванда ба додгоҳ ирсол гардидааст.
Мақомоти давлатӣ мегӯянд, ки мубориза бо фасод шадидтар мешавад, вале ба қавли таҳлилгарон, пайгирии шахсони поёнии низом беш аз шахсони мансабдори баланд ба назар мерасад.
Тоҷикистон дар раддабандии ҷаҳонӣ
Бар асоси гузориши охирини Transparency International, Тоҷикистон бо гирифтани 20 имтиёз аз 100 дар раддабандии “Индекси дарки фасод” дар байни 180 кишвар дар зинаи 162-юм ҷой гирифтааст.
Ин нишон медиҳад, ки бо вуҷуди эълони мубориза, Тоҷикистон ҳамоно дар зумраи кишварҳои фасодзадатарин боқӣ мемонад.
TajNews.org – Ахбори дақиқ, таҳлил ва назари мустақил дар як ҷо.
