Рӯзи 25-уми апрел, духтари 17-солае аз ноҳияи Рӯдакӣ, ки беш аз даҳ шабонарӯз бедарак буд, пайдо гардид. Сабабҳои аз хона рафтани ӯ ва макони будубошаш ҳоло расман шарҳ дода нашудааст.
Наздикони духтар дар суҳбати кӯтоҳ бо Радиои Озодӣ гуфтаанд, ки духтар дарёфт шудааст ва ҳоло зери бозпурсии мақомот қарор дорад. Моҳибиён Шарифова, модарбузурги наврас, рӯзи 24-уми апрел, як рӯз қабл аз ёфт шудани наберааш, ба Радиои Озодӣ гуфта буд, ки наберааш рӯзи 10-уми апрел бе огоҳӣ аз хона рафтааст.
Ба гуфтаи модарбузург, он рӯз духтар пас аз анҷоми корҳои хонагӣ ба фурӯшгоҳ рафтааст ва дигар барнагаштааст.
Дар ҳамин ҳол, хабар дода шуд, ки дар ноҳияи Ҷалолиддини Балхӣ низ як духтари 17-сола беш аз даҳ рӯз бедарак буд. Даврон Шаҳбозов, падари духтари гумшуда, рӯзи 24-уми апрел иттилоъ додааст, ки духтараш пас аз берун рафтан аз хона нопадид шуд, вале дертар телефонӣ хабар расонд, ки ёфта шудааст.
Ин ду наврас ягона ҳолатҳои бедаракшавӣ нестанд. Танҳо дар моҳи апрел, пулиси шаҳри Душанбе аз гум шудани даҳ наврас хабар дода буд. Баъзе аз онҳо пайдо шуданд, аммо сабабҳои рафтани онҳо расман шарҳ дода нашудааст.
Равоншиносон, аз ҷумла Наргис Тоймастова, сабабҳои асосии аз хона гурехтани наврасонро ба хоҳиши новобастагӣ, моҷароҷӯӣ ва эҳсоси муҳаббат рабт медиҳанд. Ба гуфтаи ӯ, “наврасон мехоҳанд мустақил бошанд ва вақте монеа мебинанд, аз хона мераҳанд. Ишқу ошиқӣ ва эҳсосот низ нақш доранд.”
Равоншинос ҳамзамон тавсия медиҳад, ки волидайн бояд бо эҳсосот ва рафтори фарзандонашон бодиққат бошанд ва нишонаҳои нигаронкунандаро сари вақт дарк намоянд.
Тибқи оморҳои расмии мақомоти Тоҷикистон, ҳар сол то 1000 ҳолати бедаракшавӣ сабт мешавад ва зиёда аз нисфи гумшудагон пас аз муддате ёфт мегарданд. Бо вуҷуди ин, ҳамоно одамоне ҳастанд, ки бо гузашти солҳо аз онҳо дараке нест.
TajNews ин мавзӯъро пайгирӣ мекунад.
[…] Манбаъ […]