Сардори фурудгоҳи байналмилалии шаҳри Душанбе, Абдуллозода Исматулло Файзулло, аз ҷониби Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо иттиҳоми тасарруфи маблағҳои давлатӣ боздошт шудааст. Дар ин бора як манбаи боэътимод аз дохили Агентӣ ба TajNews иттилоъ дод, бо шарти махфӣ мондани номаш.
Тафсилоти расмии ҳодиса то ҳол аз ҷониби мақомоти тафтишотӣ пахш нашудаанд. Аммо худи факти боздошти як шахсияти муҳим дар зерсохтори нақлиётии кишвар — аз ҷумла раҳбари фурудгоҳи пойтахт — шаҳодат аз ҷиддияти иттиҳомҳо медиҳад.
Фурудгоҳи Душанбе – нуқтаи муҳими стратегӣ ва маркази пулӣ
Фурудгоҳи байналмилалии Душанбе яке аз муҳимтарин зерсохторҳои нақлиётӣ ва молии кишвар ба ҳисоб меравад. Дар чанд соли охир, махсусан пас аз афзоиши сафарҳои байналмилалӣ ва муҳоҷирати меҳнатӣ, гардиши молӣ ва равуои мусофирон дар ин муассиса ба маротиб боло рафтааст. Бинобар ин, мавриди назорати ҷиддии сохторҳои давлатӣ қарор доштани он як амри табиист.
Абдуллозода Исматулло Файзулло дар мақоми худ на танҳо масъули ташкили равандҳои дохилӣ, балки як қисми муҳими сиёсати иқтисодии давлатӣ дар бахши авиатсия маҳсуб мешуд.
Боздошти ӯ бо иттиҳоми “тасарруфи маблағ” метавонад ба таҳқиқоти васеътар дар дохили низоми фурудгоҳ ва ҳатто Вазорати нақлиёт замина гузорад.
Боздошти навбатии мансабдор — ё оғози сиёсати ҷиддитари зиддифасодӣ?
Дар чанд соли охир ҳукумат пайваста эълон мекунад, ки мубориза бо фасод яке аз самтҳои афзалиятноки сиёсати давлатӣ аст. Аммо мунаққидон мегӯянд, ки аксари боздоштҳои пурсарусадо танҳо бо дастури боло анҷом мешаванд, ва то замони ҷорӣ нашудани механизмҳои мустақили назорат, ин ҷараён бештар характери маъракавӣ хоҳад дошт.
Аз сӯи дигар, боздошти шахсони сатҳи баланд, махсусан дар муассисаҳои калидӣ, метавонад нишон диҳад, ки ҳукумат ҳадди ақал дар сатҳи муайян аз мубориза бо фасод як абзори сиёсии фишор ва тавозуни дохилӣ истифода мебарад.
Боздошти Абдуллозода Исматулло Файзулло, раҳбари фурудгоҳи Душанбе, бо иттиҳоми тасарруфи маблағ, як паёми равшани навбатии Агентии зиддифасод аст. Аммо саволҳои зиёде боқӣ мемонанд:
- Таҳқиқот то куҷо шаффоф ва мустақил хоҳад буд?
- Оё боздошти ӯ оғози ислоҳоти воқеӣ дар низоми авиатсионӣ хоҳад шуд?
- Ва ё танҳо як намунаи навбатии муборизаи фасоди “намояндашаванда” дар сатҳи давлатӣ аст?
Ҷомеа ва расонаҳо посухи ин суолҳоро интизоранд — ва муҳим он аст, ки ин навбат адолат ҳақиқатан таъмин шавад, на танҳо як боздоштӣ барои нишондод ба ҷомеа
[…] Source link […]