Идибеки Мардон, блогери шинохта ва маъруф бо лақаби “Идибеки Бохтарӣ”, бо ҳукми Додгоҳи шаҳри Бохтар ба як соли маҳрумият аз озодӣ маҳкум гардид. Ба иттилои манобеи TajNews, додгоҳ ӯро бо моддаи марбут ба истифодаи зӯроварӣ нисбат ба намояндаи ҳокимият гунаҳкор донистааст.
Ҳукм ҳафтаи гузашта содир шудааст, вале ҳанӯз қувваи қонунӣ нагирифтааст. Назари худи блогер, наздикон ва вакили дифоъ то ҳол дастрас нест. Маълум нест, ки онҳо аз болои ҳукм шикоят хоҳанд бурд ё не.
Аз таблиғи ҳукумат то интиқоди мақомдорон
Идибеки Мардон то чанд моҳ пеш дар шабакаҳои иҷтимоӣ бо нашри наворҳое, ки аз сиёсати расмӣ пуштибонӣ мекарданд, маъруф шуда буд. Вале дар нимаи дуюми соли 2024 ӯ бо нашри як видео ҳукумати маҳаллии шаҳри Бохтар, бахусус шаҳрдор Абдулмаҷид Муминзодаро мавриди интиқоди шадид қарор дод.
Дар ин навор, ки моҳи сентябри соли гузашта паҳн шуд, блогер шаҳрдори Бохтарро ба таҳдид, фишор ва “шиканҷаи маънавӣ” муттаҳам кард ва гуфт, ки “аз дасти чунин мақомдорон маҷбур шудааст кишварро тарк кунад”.
Пас аз нашри навор, додгоҳ бо ҳукми ғоибона Идибеки Мардонро боздоштӣ эълон намуд. Маълум нест, ки ӯ баъдан ихтиёран ба Тоҷикистон баргашт ё аз кишвари дигар истирдод гардид, вале ба гуфтаи додгоҳ, ӯ пас аз бозгашт боздошт шуд.
Гузашта ва шеваи фаъолият
Идибеки Мардон дар гузашта бо наворҳое, ки алайҳи мухолифони сиёсӣ равона шуда буданд, машҳур шуда буд. Ӯ ҳамчунин бо риши дароз ва шеваи сухангӯии тунду эҳсосӣ дар шабакаҳои иҷтимоӣ ҷалби диққат мекард. Аммо баъдан муносибаташ бо мақомдорон, бахусус дар зодгоҳаш – шаҳри Бохтар, шиддат гирифт.
Худи ӯ пештар гуфта буд, ки маълумоти зиёде дар бораи фасод ва амалҳои ғайриқонунии баъзе мансабдорон дар даст дорад ва дар сурати зарурат онҳоро нашр хоҳад кард.
TajNews – манбаи боэътимоди ахбор.
Моро пайгирӣ кунед барои хабарҳои расмӣ ва таҳқиқоти муътамад аз Тоҷикистон.
